"ಬೆಳಕು" ಅಂದರೆ?

"ಬೆಳಕು" ಎಂದರೇನು?
ಈ ವಿಕ್ಷಿಪ್ತ ಪ್ರಶ್ನೆಯನ್ನು
ಇವತ್ತು ಯಾಕೋ ನನ್ನ ಬದುಕಿಗೆ ಕೇಳಿದ್ದೆ.
"ನಿನ್ನನ್ನು ನೀನು ಸುಟ್ಟುಕೊಳ್ಳುವುದು"
ಎಂದು ಗಂಭೀರವಾಗಿ ಉತ್ತರಿಸಿತ್ತು ಬದುಕು!

ಅರ್ಥವಾಗದೆ ಚಡಪಡಿಸಿದ್ದೆ.
ಕೊನೆಗೆ ನನ್ನ ಅಂತರಾತ್ಮವನ್ನೇ ಕೇಳಿಕೊಂಡೆ.
ಹೇಳು ಬೆಳಕೆಂದರೇನು?
"ಬೇರೇನಿಲ್ಲ.ಬೆಳಕೆಂದರೆ ಬೆಳಕು,ಅಷ್ಟೆ"
ಉತ್ತರಿಸಿತ್ತು..ನನ್ನೊಳಗಿನ ಆತ್ಮಸಾಕ್ಷಿ!
ಪ್ರಶ್ನೆಯು ಉತ್ತರದ ಬೆಳಕ ಜೊತೆ ನಕ್ಕಿತ್ತು.
ಉತ್ತರವೂ ಅದೇ ಬೆಳಕಿನಲ್ಲಿ ಉರಿಯುತ್ತಿತ್ತು.
ಪ್ರಶ್ನೆ ಬೆಳೆಯುತ್ತಾ ಬೆಳೆಯುತ್ತಾ
ಉರಿವ ಬೆಳಕಾಯಿತು. ಬೆಳಗಾಯಿತು.
ಪ್ರಶ್ನೆಯೂ ಬೆಳಕೇ. ಉತ್ತರವೂ ಬೆಳಕೇ!