ಹಾದಿಯ ಹಂಗು ತೊರೆದ ಮೇಲೆ... ಹಾಡುಗಳದ್ದೇ ಗುಂಗು...!
ಇಫ್ತಾರಿನ ಹಂಗೇಕೆ ಹೇಳು?
ಕಣ್ಣೀರ ಜೊತೆ ಅನ್ನ ಬೆರೆಸಿ ತಿನ್ನಲು?
ಬಿರುಗಾಳಿಯ ದಿಗಿಲಿಲ್ಲ ನನಗೆ..
ನೀರವ ರಾತ್ರಿಯದ್ದೇ ಭಯ!
ಸಾವಿನ ಹೆಗಲ ಮೇಲೆ ಕೈ ಹಾಕಿಕೊಂಡೇ
ಹೆಜ್ಜೆಮೂಡದ ಹಾದಿಯ ಸವೆಸಿದವನು!
ಸಾವಿನೂರಿನ ವಿಳಾಸ ಸಿಗಲೇ ಇಲ್ಲ...
ಅರೇ..ಸಾವಿಗೂ ನನ್ನ ಕಂಡರೆ ಅದೆಂಥ ಉಡಾಫೆ!
ಖಾಲಿ ಜೇಬಿನ ಫಕೀರನಿಗೂ ನಕ್ಷತ್ರ ಎಣೆಸುವಾಸೆ!
ಜೋಳಿಗೆಯ ತುಂಬಾ ಬರೀ ಹಾಡುಗಳೇ..
ಅವುಗಳನ್ನೆಲ್ಲಾ ಅಖೈರಾಗಿ ಒಮ್ಮೆಯಾದರೂ
ಎಣೆಸಬೇಕೆನ್ನುವ ನಿನ್ನ ಖಯಾಲಿಗೆ ಏನು ಹೇಳಲಿ?
ಹಸಿವಿನಿಂದ ಆ ಹಾಡುಗಳೆಲ್ಲವೂ ಸತ್ತಿವೆ..
ನೆನಪಿಡು ; ಹಸಿವು ಎಲ್ಲವನ್ನೂ ಕೊಲ್ಲುತ್ತದೆ.
ಸಾವೂ ಕೂಡಾ ಸಾಯುವುದು ಹಸಿವಿನಿಂದಲೇ!
ಸಾಲಲಿ ಮುಂದೆ, ಭಾರತಾಂಬೆ!!
ಬಾಗಿದ ನಡು,ಬತ್ತಿದ ಕಣ್ಣು..
ಎದೆಯಲ್ಲಿ ಕೀವು ಸುರಿವ ಹುಣ್ಣು!
ಕಾಲು-ತಲೆಯ ಮೇಲೆ ಧೂಳು-ಮಣ್ಣು!!
ಹೊಟ್ಟೆ ಹಸಿದಿದೆ, ಕೇಳುವರಾರು?
ಬದುಕು ಕುಸಿದಿದೆ, ನೋಡುವರಾರು?
ಸನಾತನೆಯಂತೆ,ಧೀರೆಯಂತೆ..ದೈನೇಸಿಯಾಗಿದ್ದಳು.
ಅನ್ನಪೂರ್ಣೆಯಂತೆ,ಆದಿತ್ಯೆಯಂತೆ..ಕೈಯೊಡ್ಡಿದ್ದಳು!!
ಅದೇನೋ ರೋಗವಂತೆ, ಭಿಕ್ಷೆ ಬೇಡಬಾರದಂತೆ!
ಮಾಸ್ಕು ಹಾಕಿಕೊಳ್ಳಬೇಕಂತೆ, ದೂರ ನಿಲ್ಲಬೇಕಂತೆ!
ಹೊಟ್ಟೆಗೆ ಹಾಕುವ ಮಾಸ್ಕುಗಳಿಲ್ಲವೇ?ಹಸಿವ ಮುಚ್ಚಲು?
ಹಸಿವಿಗಿಂತ ಭೀಕರ ರೋಗ ಯಾವುದಿದೆಯಂತೆ?
ಈ ಶತಕೋಟಿ ಮಕ್ಕಳ ತಾಯಿಯ ಅದೇ ಹಳೆಯ ಪ್ರಶ್ನೆ!!
ತಲೆ ನರೆತ ಈ ಬಡಕಲು ಮುದುಕಿಗೆ
ಅದೆಂಥ ಜೀವನಪ್ರೀತಿ ನೋಡು!
ಇನ್ನೂ ಹಡೆಯುತ್ತಲೇ ಇದ್ದಾಳೆ, ಅಗಣಿತ ಪಾಪ ಸಂಕುಲವ!
ಜಾತಿ-ಧರ್ಮ,ಪಂಥ-ಪಂಗಡಗಳ ತೊಟ್ಟಿಲಿಗೆ ಹಾಕಿ..
ಅದೇನೋ ಸಂವಿಧಾನದ ಜೋಗುಳ ಹಾಡುತ್ತಿದ್ದಾಳೆ!
ಅರ್ಥ ಮಾಡಿಕೊಂಡ ಕೂಸುಗಳಿಗೆ ಸುಖದ ನಿದ್ದೆ!
ಆಗದಿದ್ದವುಗಳ ರಚ್ಚೆಗೆ ಹೈರಾಣಾಗಿದ್ದಾಳೆ ಪಾಪದ ಮುದುಕಿ!
"ಅಣ್ಣಾ ಜಗಳೂರು ಬಸ್ ಹೋಯ್ತಾ?"-ಯಾರೋ ಕೇಳತಾರೆ. ಕೇಳಿಸಿಕೊಂಡ ಅಂಗಡಿಯವ, ಗೊತ್ತಿದ್ದರೂ ಹೇಳಲ್ಲ.ನಾನ್ಯಾಕೆ ಪುಕ್ಸಟ್ಟೆ ಹೇಳಲಿ ಎಂಬ ಸಣ್ಣತನ. ಅವನ ಅಂಗಡಿಯಲ...
